沙膽虹手記：訴諸法律 取回公道 (《蘋果日報》，04/07/2012)

《蘋果日報》記者上周六在十米外採訪區，就香港人希望平反六四向國家主席胡錦濤高聲提問，被數名便衣警員帶走，非法禁錮十多分鐘。記者前日就此事問梁振英，沙膽虹估唔到佢竟然會話，要等警方調查清楚先至回應。梁振英咁答擺明係縮骨，呢單嘢唔使查都知道係警方濫權，見到記者問胡錦濤六四平反問題，即刻觸動神經，非法禁錮記者，等胡走咗才放人。梁振英口口聲聲會捍衞香港核心價值，就在七．一宣誓出任香港七百萬人的特首後發表演講，仍信誓旦旦話會捍衞香港核心價值，點解又信口雌黃，二十四小時後就冇件事，連香港新聞自由被警方無理侵犯都鵪鶉，不予置評。


照《蘋果》記者講番當日事件，沙膽虹覺得一定不只是前線幾位人員的自把自為，由最初便衣阻攔記者在採訪區內前行，到突然押記者去後巷，應該是收到命令；到胡離場後才放人，亦明顯是有「柯打」。若然只是前線警務人員胡作非為，警方傍晚經過咁多個小時後才出嘅聲明，點解仍堅稱冇錯，有需要去核實記者身份和作出查問？

面對這樣濫權的警方，面對這樣一個對新聞採訪自由遭警方踐踏而不吭一聲的特首，記者除了訴諸法律，取回公道，又有甚麼可以做呢？

沙膽虹