【本報訊】近期一再被質疑干預言論自由的《信報》，又發生懷疑審查專欄作家文章的醜聞。作者陳嘉銘投訴，前日收到該報專欄版編輯來電，指他準備於今天刊登的文章「偏激咗少少」，要求改寫。《信報》總編輯郭艷（圖）明否認指控，強調編輯只是「閒聊」，從來沒要求他改寫。
作家：編輯要求調節
陳在《信報》的專欄＜櫻桃花開＞逢周三刊登，他指出，本周一下午，該版編輯在他交稿後致電給他，指文章內容「偏激咗少少」，要求他調節。他今期的文章題為＜玩完香港，香港玩完＞，回應李嘉誠指香港是被寵壞的孩子。
文章寫到：「因為誠哥依據的，是香港競爭力，有GDP顯示落後於先天不足的新加坡；而民粹不滿，在誠哥眼中會拖累發展，所以說面目全非，是民心所為，令經濟落伍，等同玩完。這種經濟發展想像，當然令香港玩完，因為說穿了，正是它的單一思維，令香港依賴經濟，而犧牲掉更重要的本土風貌。」
陳稱《信報》編輯認為文章內容「好似所有事都怪在李嘉誠責任上，好似唔係幾好」。他表明不會改寫，只會寫另一篇「曲線」回應今次事件的文章，該編輯回覆說：「你明就最好啦！你寫過一篇真係麻煩你。」郭艷明昨否認審查文章，指該編輯從無說過文章偏激，亦無要求陳改寫，有關指控只是作者「無限聯想」。陳指她講大話及推卸責任，他肯定當日編輯再三提及他用字偏激，「我冇理由挑起爭端，我做乜要搞鬼你啫？」
《信報》總編郭艷明回應
記者：（專欄版）編輯有冇同陳嘉銘講到話乜嘢原因佢要打畀陳嘉銘？
郭：又冇講過話你要點要點，乜嘢都冇，只係一個咁樣嘅conversation（對話），佢當時就話如果咁不如我寫過篇啦。我哋又冇問題，如果你話我係咁講，我哋又冇乜嘢。我覺得一個咁嘅對話，又會產生到無限聯想，咁𠵱家係我始料不及囉。
記者：會唔會係編輯同作者溝通上誤會？
郭：我諗應該係嗰位接收者咁樣聯想，或者佢點諗，對唔住，我真係控制唔到。
記者：如果陳堅持出番原本第一篇文，你哋願唔願意登？
郭：我諗唔使佢堅持，你唔好將啲嘢要屈到變咗係一個一個一個……點講呢？
記者：因為你頭先講過話佢（陳嘉銘）交咗另一篇文畀你哋吖嘛。
郭：唔係！我哋冇郁過佢前面嗰篇呀！我唔使佢要求呀，我根本冇郁過個版呀！你聽清楚！總之佢之前嗰個稿係冇變過囉，由頭到尾。我想你唔好加咁多鹽鹽醋醋嘅字眼。
沒有留言:
張貼留言