兩會期間北京恐怖手段震懾港記 翻房間行李改密碼 電腦裝入監控系統 (《蘋果日報》，03/03/2011)

酒店靈異事件時有聽聞，歷史悠久的北京飯店也不例外，臨近「大事件」更有增無減。本港記者近日陸續抵達北京，採訪今日開幕的全國人大及全國政協會議，有記者的電腦被離奇安裝遙遠監控系統，有人行李被翻、密碼被改，酒店房間猶如無掩雞籠，在電話提到敏感詞「茉莉花」即自行斷線。有資深記者指，近期北京保安明顯加強，對採訪的限制亦增加。記者張嘉雯

前往北京採訪兩會的港記，大部份下榻北京飯店，且多被安排入住向長安大街和王府井的房間，有行家估計是為方便當局集中監控。一批港記前晚外出用膳後回到酒店，更相繼發現房間有「異動」。

記者手機離奇故障

「我部電腦本身有 password，出咗去返嚟之後想開 MSN，發現得返個 shortcut，個 program畀人鏟走咗。」不想公開身份的記者 A，同時發現視窗右下角有更新提示，「我撳入去見到啲紅色字，裝咗個我唔識嘅 software，後來先知係一個可以遙遠監控我部電腦嘅 program。」 A向酒店投訴，酒店堅稱沒有人出入其房間。

同行的香港記者 B亦遇「怪事」，房內已上鎖的手提行李無法用原來密碼打開，「明明係自己個篋，點解開唔到 o架呢？原本佢想叫個 bell boy上嚟踢爛佢，最終佢試咗個幾兩個鐘逐個試先開得番。」

大部份記者的手機也出現異常， A說「電話隔幾分鐘就斷線，話無訊號，之後又話張 SIM卡失效，要打開部機，入過張卡再開機先得，一個電話傾 3、 4次。」有行家用電話軟件打長途電話，「對方一提嗰三個字（茉莉花）即刻就斷咗線，再傾返就窒吓窒吓，明明 signal係好強都係咁。」該批記者昨日曾向港澳辦投訴，獲回覆「冇啲咁嘅事，唔會呀？」

隨時砌記者生豬肉

該記者有多次內地採訪經驗，指今年兩會保安明顯加強，「以前北飯（北京飯店）都係要過 security，但家連大行李都要過，仲一定要搜身，真係貼身全身摸勻你嗰隻喎。」他指對記者造成壓力，「我深信佢係特登畀我哋知佢哋係隨時都可以搞我哋，唔單止阻住我做嘢，仲可以隨時喺我個篋度唔知放啲乜話我藏毒，或者喺部電腦度加個 file話我煽動，咁點算？」

香港記者協會昨日發表聲明，批評北京政府上周日扣查採訪茉莉花集會的港記，又刪除部份記憶卡內容，踐踏新聞自由及侵犯私有財產。

此外， BBC駐京記者站早前收到外交部電話，被「勸告」不要報道茉莉花集會。 BBC記者顧求真表示， 10多名外國記者昨日一度被召到警察局，警方要求他們以後到公共場所採訪要先申請特別許可證，原因是保持街道暢通，若下周日再採訪茉莉花集會，其記者簽證續簽時將遇麻煩。