吳秀華於22小時前，喺facebook上撰長文講解離職原因。
亞視新執董雷競斌今日走馬上任，商務及經濟發展局局長蘇錦樑今日表示，暫無資料顯示，雷競斌唔係適合人選出任執董，仲呼籲大家，依家最重要係向前看，希望亞視能完善內部企業管治，提供更好服務。
換言之，亂局已完，雷公一人已成功幫亞視拆局，免卻被釘牌之危機，真係唔知應唔應該恭喜佢。
雷公上任，亞視前主播吳秀華送咗份大禮俾佢，就係喺facebook撰文，親述當日離職因由。佢就係今年一月喺施政論壇上質問特首梁振英，俾梁粉「投訴」，又得唔到亞視新聞部的上司支持，於上月中離職。吳秀華今日披露番當日事件經過，佢寫道:「新聞部主管於（施政論壇）一兩天後便收到觀眾意見，他親自看過電視論壇片段後便不再讓我出席一個月之後的財政預算案電視論壇。那是我第一次也是最後一次和這名主管因工作安排爭論。我認為他是受到政治干預而自我審查，但他否認；可惜我當時沒有真憑實據，爭吵暫告一段落。」
咁當時吳秀華問咗特首乜嘢？就係:指出梁振英份施政報告同前特首董建華嗰份相似，反而反映土地供應、長者津貼等問題，十多年嚟都解決唔到，質問梁班子有何過人之處，能夠處理呢啲長期問題。
吳秀華並寫道，亞視新聞部內「有人更變成扯線木偶甚至變本更厲」，而佢亦由嗰陣開始，被安排「盡量避免處理政治新聞」，吳秀華寫道:「新聞部主管處理政治新聞的手法確是較多年前的他保守，有時為免自我審查太明顯，唯有避重就輕。即是敏感的政治新聞不可不做，只是輕描淡寫、人有我有便算。在這個環境工作久了，人很容易變得麻木，有些人更變成扯線木偶甚至變本更厲。(略)我不知道自己一直尊敬的主管為何會愈來愈保守，是他年紀大了價值觀微調了，抑或是公司內外的壓力愈來愈沉重讓他無法忠於自己呢？」
諷刺的是，吳秀華於文末，竟然引用盛品儒當日發聲明表示要同亞視作戰至最後一刻嘅金句:「在這風雨飄搖之時離開亞視，我心存慶幸，但也感到痛心。在此，我要套用『後生、靚仔』的亞視前高層盛先生的聲明內容：『願天佑香港、天佑亞視』。」
沒有留言:
張貼留言